ربــاعيــات صلاح جاهين



أحب أعيش
أحب أعيش ولو أعيش في الغابات
أصحى كماولدتني أمي وأبات
طائر .. حوان ..حشره ..بشر ..بس أعيش
محلا الحياه ..حتى في هيئه نبات
عجبي !!.


أحسن مافيها العشق
أحسن مافيها العشق والمعشقه
وشويتين الضحك والتريقه
شوفت الحياه ، لفيت ، لقيت ألألذ
تغييرها ، وده يعني التعب والشقا
عجبي !!.


اخطفني ياللي تحبني
اخطفني ياللي تحبني ع الحصان
الدنيا قالت يوم في ماضي الزمان
اخطفني ياللي تحبني ع الفرس
الدنيا قالت ..قم خطفها الشيطان
عجبي !!.


ألأرض شوك أيوه لكين هايش
والحمره مش يعني الطريق حايش
دي دمنا السيال ..وبشره خير
أن أنتي عايشه ..وأن أنا عايش
عجبي !!.


ازاي شبابنا يقوم
ازاي شبابنا يقوم وياخد دوره
من غير صراخ يئذيه ويجرح زوره
ياهل ترى أحسن له يقعد ساكت
أو ينترك ولو خرج عن طوره ؟
عجبي !!.


أعرف عيون هي الجمال
أعرف عيون هي الجمال والحسن
وأعرف عيون تاخد القلوب بالحضن
وعيون مخيفه وقاسيه وعيون كتير
وبحس فيهم كلهم بالحزن
عجبي !!.


اقلع غماك ياتور وأرفض تلف
اكسرتروس الساقيه وأشتم وتف
قال : بس خطوه كمان ..وخطوه كمان ..
ياأوصل نهايه السكه ياالبير يجف
عجبي !!.



أنا شاب
أنا شاب لكن عمري ولا ألف عام
وحيد ولكن بين ضلوعي زحام
خايف ولكن خوفي مني أنا
أخرس ولكن قلبي مليان كلام
عجبي !!.


أنا كل يوم أسمع
أنا كل يوم أسمع .. فلان عذبوه
أسرح في بغداد والجزاير وأتوه
ماأعجبش م اللي يطيق بجسمه العذاب
وأعجب من اللي يطيق يعذب أخوه
عجبي !!.


أنا قلبي كان شخشيخه
أنا قلبي كان شخشيخه أصبح جرس
جلجلت به صحيوا الخدم والحرس
أنا المهرج .. قمتوا ليه خفتوا ليه
لا في أيدي سيف ولا تحت مني فرس
عجبي !!.


أنا الذي عشت الزمن مضيعه
بروح حزينه معفنه مضعضعه
زرعت شجره سنط لجل أنجرح
لاقيتها شعر البنت ومفرعه
عجبي !!.


أنا الذي عمري أشتياق
أنا الذي عمري أشتياق في أشتياق
وقطر داخل في محطه فراق
قصدت نبع السم وشربت سم
من كتر شوقي وعشمي في الترياق
عجبي !!.


أنا اللي بالأمر
أنا اللي بالأمر المحال أغتوى
شفت القمر نطيت لفوق في الهوا
طلته ماطلتوش ايه أنا يهمني
وليه ... مادام بالنشوه قلبي أرتوى
عجبي !!.


أنا قلي كوره
أنا قلبي كوره .. والفروده أكم
ياما أتنطح وانشاط .. وياما أتعكم
وأقول له كل ح ينتهي في الميعاد
يقول بساعتك ؟ والا ساعه الحكم ؟
عجبي !!.


أنا قلبي كوكب وأنطلق في المدار
حواليكي يامحبوبتي يانور ونار
يلف مهما يلف مابيكتفيش
وتمللي نصه ليل ونصه نهار
عجبي !!.


أنا قلت كلمه
أنا قلت كلمه وكان لها معنين
كما بطن واحده وتوأمين زين
وشين لو دنيا شر .. والتوأم الخيريموت
لو دنيا خير .. الشر حيعيش منين ؟
عجبي !!.



أنا كان لي أب
أنا كان لي أب .. وكان رئيس محكمه
ستين سنه ..في قضيه واحده أترمى
ستين سنه وطلع براءه وخرج
يشكي الحياه والموت لرب السما
عجبي !!.


أنا كنت شئ
أنا كنت شئ وصبحت شئ ثم شئ
شوف ربنا .. قادر على كل شئ
هز الشجر شواشيه ووشوشني قال :
لابد مايموت شئ عشان يحيا شئ
عجبي !!.


انسان
انسان أيا أنسان ماأجهلك
ماأتفهك في الكون وماأضألك
شمس وقمر وسدوم وملاين نجوم
وفاكرها ياموهوم مخلوقه لك ؟
عجبي !!.


انشد يا قلبي
اشد يا قلبي غنوتك للجمال
وأرقص في صدري من اليمين للشمال
ماهوش بعيد تفضل لبكره سعيد
ده كل يوم فيه ألف ألف أحتمال
عجبي !!.


أه لو أنا ومحبوبي
أه لو أنا ومحبوبي جزنا الفضا
في سفينه وحهذه الكلمه ممنوعه فى امنتدى ا .. وأشيا رضا
ساعه صفا تعجبنا نرجع لها
والهم قبل ماييجي .. يبقى مضى
عجبي !!.


أهوى الهوى
أهوى الهوى وهمس الهوى في العيون
وبسمه المغرم .. ودمعه الحنون
وزلزلات الحب نهد الصبا
أكون أنا المحبوب .. أو لا أكون
عجبي !!.


أوصيك ياابني
أوصيك ياابني بالقمر والزهور
أوصيك بليل القاهره المسحور
وأن جيت في بالك .. اشتري عقد وفل
لأي سمرا .. وقبري أوعك تزور
عجبي !!.



أوقات
أوقات أفوق ويحل عني غبايا
وأشعر كأني فهمت كل الخبايا
وأفتح شفايفي عشان أقول الدرر
ماأقولش غير حبه غزل في الصبايا
عجبي !!.


ايديا في جيوبي
ايديا في جيوبي وقلبي طرب
سارح في غربه بس مش مغترب
وحدي لكين ونسان وماشي كده
وبأبتعد ... ماأعرفش ...أو بأقترب
عجبي !!.


أيش تطلبي يانفسي فوق كل ده
حظك بيضحك وأنتي متنكده
ردت قالت لي النفس : قول للبشر
مايبصلوليش بعيون حزينه كده
عجبي !!.



أيه اللي خدته
أيه اللي خدته من مرور السنين
ياقلبي الا دمعتك وألأنين
بتئن وبتفرح وترجع تحن
مع ان مش كل البشر فرحانين
عجبي !!.


بحر الحياه
بحر الحياه مليان بغرقى الحياه
صرخت خش الموج في حلقي ملاه
قارب نجاه !.. صرخت قالو مفيش
غير بس هو الحب قارب نجاه
عجبي !!.


بره القزاز
بره القزاز كان غيم وأمطار وبرق
مايهمنيش .. أنا قلت .. ولاعندي فرق
غيرت رأي بعد ساعه زمان
وكنت في الشارع .. وفي الجزمه خرق
عجبي !!.


بلياتشو
بلياتشو قال أيه فايده فنوني ؟
وتلات وقق مساحيق بيلونوني
والطبل والزمامير وكتر الجعير
اذا كان جنون زبوني زاد عن جنوني
عجبي !!.


بين موت وموت
بين موت وموت .. بين النيران والنيران
ع الحبل ماشين الشجاع والجبان
عجبي على دي حياه .. ويا للعجب
ازاي أنا .. ياتخيـن .. بقيت بهلوان
عجبي !!.


تسلم ياغصن الخوخ
تسلم ياغصن الخوخ ياعود الحطب
ييجي الربيع .. تطلع زهورك عجب
وانا ليه بيمضي ربيع وييجي ربيع
ولسه برضك قلبي حته خشب
عجبي !!.


جالك أوان
جالك أوان ووقفت موقف وجود
ياتجود بده ياقلبي يابده تجود
ماحد يقدر يبقى على كل شئ
مع ان ... عجبي ... كل شئ موجود
عجبي !!.



حاسب من ألأحزان
حاسب من ألأحزان وحاسب لها
حاسب على رقابيك من حبلها
راح تنتهي ولابد راح تنتهي
مش انتهت أحزان من قبلها
عجبي !!.


حبيـت
حبيـت .. لكن حب من غير حنان
وصاحبت لكن صحبه مالهاش امان
رحت لحكيم واكتر لقيت بلوتي
ان اللي جوه القلب مش ع اللسان
عجبي !!.


الحلو يم اليم
الحلو يم اليم صابح رايح
سارح في حضن الميه سابح سايح
الحلو داب في البحر .. قلت ادوقه
وجدت لسه البحر برضك مالح
عجبي !!.


خرج ابن أدم م العدم
خرج ابن أدم للعدم قلت : ياه
رجع ابن ادم للعدم قلت : ياه
تراب بيحيا .. وحي بيصير تراب
ألاصل هو الموت والا الحياه ؟
عجبي !!.


خوض معركتها
خوض معركتها زي جدك ماخاض
صالب وقالب شفتك بأمتعاض
هى كده .. ماتنولش منها ألأمل
غير بعد صد ورد ووجاع مخاض
عجبي !!.


دخل الربيع
دخل الربيع يضحك لقاني حزين
نده الربيع على اسمي لم قلت مين
حط الربيع أزهاره جنبي وراح
وايش تعمل ألأزهار للميتين
عجبي !!.


دخل الشتا
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات كتير بترفض تموت
عجبي !!.


الدنيا صندوق
الدنيا صندوق دنيا .. دور بعد دور
الدكه هى .. وهى كل الديكور
يمشي اللي شاف .. ويسيب لغيره مكان
كان عربجي أو كان امبراطور
عجبي !!.


الدنيا من غير الربيع
الدنيا من غير الربيع ميته
ورقه شجر ضعفانه مفتته
لأ ياجدع غلطان تأمل وشوف
زهر الشتا طالع في عز الشتا
عجبي !!.


دي مذكرات
دي مذكرات وكتبتها من سنين
في نوته زرقا لون بحور الحنين
عترت فيها .. رميتها في المهملات
وقلت أما صحيح كلام مخبولين
عجبي !!.


زحام وأبواق
زحام وأبواق سيارات مزعجه
اللي يطول له رصيف .. يبقى نجا
لو كنت جنبي ياحبيبي أنا
مش كنت أشوف ان الحياه مبهجه
عجبي !!.


سمعت نقطه ميه
سمعت نقطه ميه جوه المحيط
بتقول لنقطه ماتنزليش في الغويط
أخاف عليكي م الغرق .. قلت أنا
ده اللي يخاف م الزعد يبقى عبيط
عجبي !!.


عجبي !!.
سنوات وفايته سنوات وفايته عليا فوج بعد فوج
واحده خدتني ابن والتانيه زوج
والتالته أب خدتني والرابعه ايه
أيه يعمل اللي بيحدفه موج لموج ؟
عجبي !!.


سهير ليالي
سهير ليالي وياما لفيت وطفت
وف ليله راجع في الضلام قمت شفت
الخوف .. كأنه كلب سد الطريق
وكنت عاوز أقتله .. بس خفت
عجبي !!.


شاف الطبيب جرحي
شاف الطبيب جرحي وصف له ألأمل
وعطاني منه مقام يادوب ماأندمل
مجروح جديد ياطبيب وجرحي لهيب
ودواك فرغ مني .. وأيه العمل ؟
عجبي !!.


الضحك قال
الضحك قال ياسم ع التكشير
أمشير وطوبه وأنا ربيعي بشير
مطرح مابظهر بنتصر ع العدم
أن شاء الله أكون رسمايه بالطباشير
عجبي !!.


ضريح رخام
ضريح رخام فيه السعيد اندفن
وحفره فيها شريد من غير كفن
مريت عليهم .. قلت ياللعجب
لاتنين ريحتهم فيها نفس العفن
عجبي !!.


عاد الربيع
عاد الربيع كأنه طعم الحب
والحب نار جوه العروق بتصب
اتمتع ازاي بيه وأنا متقطع
من كتر خوفي لا في الخطيئه يطب ؟
عجبي !!.


عجبي على العجب
عجبي على العجب العجيب العجاب
لما الحقيقه تطل بعد احتجاب
وتروق وتحلا وفجأه تصبح مفيش
كنثل طرطيش بحر ياما خد وجاب
عجبي !!.


العشب طاطا للنسايم
العشب طاطا للنسايم ونخ
أخضر طري مالهش في الحسن أخ
عصفور أنا عبيط أنا .. غاوي بهجه وغنا
ح أنزل هنا .. وأن شاء الله هبرني فخ
عجبي !!.


علقت في المسمار
علقت في المسمار قناع مهزله
ومعاه قناع مأسأه بحزنه ابتلا
بصيت لاقيتهم يشبهوا بعضهم
واهو ده العجب ياولاد .. وألا فلا
عجبي !!.


علم اللوع
علم اللوع أضخم كتاب في ألأرض
بس اللي يغلط فيه يجيبه ألأرض
أما الصراحه فأمرها ساهل
لكن لاتجلب مال ولا تصون عرض
عجبي !!.


على رجلي دم
على رجلي دم .. نظرت له مااحتملت
على ايدي دم .. سألت : ليه ؟ لم وصلت
على كتفي دم وحتى على رأسي دم
أنا كلي دم .. قتلت ؟ ... والا أتقتلت ؟
عجبي !!.


عيد
عيد .. والعيال اتنططوا ع القبور
لعبوا استغمايه .. ولعبوا بابور
وباللونات .. ونايلونات شفتشي
والحزن ح يروح فين جنب السرور
عجبي !!.


عيني رأت عصفور
عيني رات عصفور ووياه ابنه
بيحدفه في الريح وياخده ف حضنه
نوبتين وتالت نوبه .. عجبي عليهم
كانوا سوا بيرفرفوا ويغنوا
عجبي !!.


عيني رأت مولود
عيني رأت مولود على كتف أمه
يصرخ تهنن فيه يصرخ تضمه
يصرخ تقول يابني ماتنطق كلام
ده اللي مايتكلمش ياكتر همه
عجبي !!.


غمست سنك في السواد
غمست سنك في السواد ياقلم
علشان ماتكتب شعر يقطر ألم
مالك جرالك ايه يامجنون ... وليه
رسمت ورده وبيت وقلب وعلم
عجبي !!.


في يوم صحيت شاعر
في يوم صحيت شاعر براحه وصفا
الهم زال والحزن راح وأختفى
خدني العجب وسألت روحي سؤال
أنا مت ؟.. والا وصلت للفلسفه ؟
عجبي !!.


الفيلسوف
الفيلسوف قاعد يفكر سيبوه
لا تعملوه سلطان ولا تصلبوه
ماتعرفوش ان الفلاسفه ياهوه
اللي يقولوه بيرجعوا يكدبوه ؟
عجبي !!.


فتحت شباكي
فتحت شباكي لشمس الصباح
مادخلش منه غير عويل الرياح
وفتحت قلبي عشان أبوح بألألم
ماخرجش منه غير محبه وسماح
عجبي !!.


فوق تحت
فوق تحت.. ورا قدام .. يمين شمال
في الجو .. تحت الميه أو في الرمال
طلب الكمال يحرم على الممكن
والممكنات دول محرومين م الكمال
عجبي !!.


فارس وحيد
فارس وحيد جوه الدروع الحديد
رفرف عليه عصفور وقال له نشيد
منين منين .. ولفين لفين ياجدع
قال من بعيد ولسه رايح بعيد
عجبي !!.


قالوا
قالوا الشقيق بيمص دم الشقيق
والناس ماهياش ناس بحق وحقيق
قلبي رميته وجبت غيره حجر
داب الحجر ... ورجعت قلبي رقيق
عجبي !!.


قالوا السياسه مهلكه
قالوا السياسه مهلكه بشكل عام
وبحورها يابني خشنه مش ريش نعام
غوص فيها تلقى الغرقانين كلهم
شيلين غنايم .. والخفيف اللي عام
عجبي !!.


قالوا ابن أدم روح
قالوا ابن أدم روح وبدنه كفن
قالوا لأ بدن .. قالوا لأ ده روح في بدن
رفرف فؤادي مع الرايات في الهوا
أنا قلت لأ روح في بدن في وطن
عجبي !!.


كان في زمان سحليه
كان في زمان سحليه طول فرسخين
كهفين عيونها وخشمها بربخين
ماتت .. لكين الرعب لم عمره مات
مع أنه فات بدل التاريخ تاريخين
عجبي !!.



كروان جريح
كروان جريح مضروب شعاع م القمر
سقط من اتلسموات فؤاده أنكسر
جريت عليه قطه عشان تبلعه
أتاريه خيال شعراء وملهوش أثر
عجبي !!.



كيف شفت قلبي
كيف شفت قلبي والنبي ياطبيب
همد ومات والا سامع له دبيب
قاللي لاقيته مختنق بالدموع
ومالوش دوا غير لمسه من ايد حبيب
عجبي !!.



لـيـه ياحبيـتي
ليه ياحبيبتي مابيننا دايما سفر
ده البعد ذنب كبير لا يغتفر
ليه ياحبيبتي مابيننا دايما بحور
أعدي بحر ألاقي غيره أتحفر
عجبي !!.



لو فيه سلام
لو فيه سلام في ألأرض وأمان وأمن
لو كان مفيش ولا فقر ولا خوف وجبن
لو يملك ألأنسان مصير كل شئ
أنا كنت أجيب للدنيا ميت ألف ابن
عجبي !!.



لاتجبر ألأنسان
لا تجبر ألأنسان ولا تخيره
يكفيه مافيه من عقل بيحيره
اللي النهارده بيطلبه ويشتهيه
هو اللي بكره ح يشتهي يغيره
عجبي !!.



لولا اختلاف الرأي
لولا أختلاف الرأي يامحترم
لولا الزلطتين ماالوقود أنضرم
ولولا فيرعين ليف سوا مخاليف
كان بيننا حبل الود كيف اتبرم
عجبي !!.



مع ان كل الخلق
مع ان كل الخلق من اصل طين
وكلهم بينزلوا مغمضين
بعد الدقايق والشهور والسنين
تلاقي ناس أشرار وناس طيبين
عجبي !!.



ماحد في الدنيا
ماحد في الدنيا دي واخد جزاته
ولا حد بيفكر في غير لذاذته
ماتعرفيش ياحبيبتي .. أنا وأنتي مين ؟
انتي عروس النيل .. وأنا النيل بذاته
عجبي !!.



غمض عينيك
غمض عينيك وأمشي بخفه ودلع
الدنيا هى الشابه وأنت الجدع
تشوف رشاقه خطوتك تعبدك
لكن انت لو بصيت لرجليك ... تقع

وعجبـــــى